Oñatiko Antxintxiketan atletismo taldeak antolatuta lagun koadrila politak –14 joan ziren– asteburu pasa ederra egin du Madrilen. Hala, maratoian egindako esfortzutik errekuperatzen zebilela egin du berba Asier Osinagak GOIENArekin.
"Ederto ibili gara. Gutako bakoitzak lortutako marka alde batera utzita, oso positiboa izan da Madril moduko hiri baten lehiatzea. Helburu garbia geneukan, kirola aitzakia moduan hartuta jendea taldera gerturatzea, eta jende berria ezagutzea, eta hori bete dugu. Pentsa, hurrengo bidaia nora egin pentsatzen hasita gaude jada".
Hainbat distantzia aukeran
Denek ez zuten maratoia egin: "Oso zaila da maratoia egiteko 20 lagun batzea, eta horregatik aukeratu genuen Madril, 10 kilometroko lasterketa egiteko aukera ematen zuelako, edo maratoi erdia, ala maratoia". Hala, hiru lagunek egin zuten maratoia, beste hiruk 10 kilometrokoa, eta gainontzekoek maratoi erdia.
Zirkuitu aldapatsua
Osinagaren esanetan Madrilgoa ez da markak egiteko zirkuiturik aproposena: "Aldapa asko dituen zirkuitua da. Maratoian, esaterako, oso zaila zen erritmo jakin bati eutsi ahal izatea, gorabeherek erritmoa apurtzen zutelako". Baina orokorrean denak geratu ziren egindako lanaz gustura, eta Osinagak Ritxar Fernandezek egindako lasterketa nabarmendu du, 10 kilometroko proban Oñatikoa zortzigarren sailkatu zelako.
No hay comentarios:
Publicar un comentario